لعراق

يعراق من نذكرك تلهب حروفك نار
تاريخ عِز اومجد واليوصفك يحتار
امنين ابتدي يا عصر إينانا لوعشتار
القانون من انكتب للبشر .. منّك صار
وعله المسلة انختم إسمك عراق أحرار
روض اوجنان اوعسل والحور والأنهار
مهبط صرت للرُسل .. ليش الله ليك ختار ؟
لأن ترتبتك مفخرة اوتختارك الأطهار
وحنه اهل أُور اولكش سومر وهل قيثار
إسأل وزيد البحث تلگاهن ابذيقار
إنته اوَّل اللي كتب علم الحرف وسرار
تشهد حضارة أكد والصرح ماينهار
كل متر بي مأثرة وكل متر بيه آثار
وبابل .. معالم علم يو مدرسة إعمار
البردي والطين اجتمع جنّة عدن وهوار
يعراق بيك افتخر گلبی لك مسكن دار
يعراق هدني السهر دمع المحب مدرار
يعراق مشتاگ إلك كلساع أطگ ونهار
غربتنه ماتنتهي او شو طوَّل المشوار
يلرافدينك حسد هيِّجت حقد الجار
بس ياعراق الصبر .. ندري الزمن دوّار
تبقه انتَ صرح العلم .. ناسك نجوم اقمار
يحفظك رب العلى .. من آفة الأشـــــــــرار